شمّيتو وعْشقْتو

شمّيتو وعْشقْتو

سعدي بحبّي        جابو لهوى عنْدي

صوْتو مبْحوح      نواحْ لحْمام فْ الدّوح

اهْبال الشريفة           زين الشلوح

زْواقْ الرّيشة        فْ اجْناحْ البوحْ

وانا ما احْضرتْشْ ليك يا يمّة وقْتْ تخْراجْ الرّوحْ

***

الدفّة زرْﮜة            ولحديدْ اكْحلْ

البابْ اتشرّعْ            الزين ادخلْ

وانا جيتْ نتبرّعْ      الﮜلْبْ احصلْ

هو اللّي تسرّعْ     ولاّ بابو اتحلْ

وهذا اشْبابْ اصغيرْ يا مّة ما اشْبعْ فْ الدّنيا

***

العوْدة برﮜيّة     واللّجامْ اخضرْ

الجّعْبة روميّة      والزْنادْ اصفرْ

لمضمّة خبوريّة     والقفْطانْ احمرْ

لكميّة منقْرة     والسّيف والخنجرْ

وسالو مالو، خلّى مضمْتو...خلّى دليلو

  

***

النهارْ اللّوّلْ     جيتْ غنْسوّلْ

ﮜلْبو مجْروحْ       ابغى يتحوّلْ

ﮜلْبي مفتوح       ولعْقلْ متوّلْ

جيتْ نريّحْ     اعليهْ ما معوّلْ

وشمّيتو واعْشقْتو وكانْ اللّي كانْ

***

ريحْتو نسْمة      وْ زينو افْحلْ

شوفتو بسْمة        وشعْرو اكْحلْ

فمّو حلْوى        وريﮜو اعْسلْ

وانا جيت غا نْطلْ       لﮜيتو ادْخلْ

كلّو آحبّي كلّو

ومزّينها قرْصة على ﮜصاصْ الخيْلْ

***

المجْبدْ احْرشْ       والعوْدة برﮜيّة

العلاّمْ امْعاشي     والﮜصّة اسباعيّة

الطّيْرْ ارْوشْ      والسّلوﮜي والسلوﮜيّة

ها العدّابْ ها الثّعْلبْ         ها لحْجلْ ها الكدْريّة

وهانا يا لغْريبْ...آ مولْ الشّعْبة ليك ديبْ

  الشماعية

07/12/2010