آ الشتى

---

**********

---

آ الشتى...

آلشتى... تا تا ... تا تا
مالكي ما تصبي
خافي من ربي
وسقي الأرض العطشانة

آ الشتى... تا تا... تا تا
يا بتي مالكي ما تصبي
خافي من ربي
وسقي لبهايم اللكحانة

آ الشتى... صبي... صبي
راه اولادك في قبي
فيهم الكمح و الشعير
للبهايم و النمل والطير
اوليكم وليا حتى أنا

آ الشتى ...صبي...صبي
ينزل الغيث
يكبر الزرع
ويجواد الضرع
وتفرح هي ونفرح أنا

و آ الشتى ديال مولانا
راه السبولة عطشانة
الصحيحة عيانة
لبهايم دلهانة
و العقول تلفانة

وآ الشتى...صبي...صبي
خلي الرحمة تنزل
لقلوب تغسل
يدور لعقل
و يزول الدل
وتفرحي يا لال ونفرح أنا

و آ الشتى ...تا تا ...تا تا
صبي...صبي...صبي
راه ولادك في قبي
ولا علموك تكذبي
على الأرض و عليا حتى أنا

صبي ...غا ...صبي
خليني نفرح في قلبي
الصباح احصاد
ولعشية دراس
و في الليل فراجة مع ولاد الناس

من بعد لعشى وصلاتو
وليدات الدوار وبنياتو
الراجل و عيالاتو
الخو و خواتاتو
و العاشق و اهلياتو

و الدك دك دك
راس لعدو يدكدك
نفورو عليه البلبولة
والرامي عينو كحلة
منيشة في السبولة

و غير صبي يا الشتى
صبي ...صبي
راه ولادك في قلبي
راه امك تجري و تطيح
راه اباك اداه الريح

ولد الدوار
06/05/2007

س01و03د