بعض إبداعات تلامذة القدس بالشماعية 2

كـــــيد الكيديـــــــــن

گال سيدي عبد الرحمان المجدوب

بهت النسا بهتين

ومن بهتهم جيت هارب

يتحزمو باللفاع

ويتخلخلو بالعكارب

دخل ف كيد الكيدين

بجمع مسالو يخرج الدين

تما بلا خرجا لقى وحالو

حزام الفاع يجمع الضلاع

ويصونها بشكل مرفاع

وقريس العكارب

بيه يبات هارب

را الدنيا دار مهجورة

بسقف خارب

 والناس تايها ف سقف

الدنيا خراب

يسترو العيوب يرجعو الهارب

هدا حال ل دخل

ف كيد الكيدين

نزيدو ندمجو من كلام المجدوب

نخرجو معاني جرارة

ترمز للحضارة

 تبين قيمت النسا بلا عوجيا

بلا ضرارة

 حديت النسا يونس ويعلم

الفهامة يكونو شركة

من الريح ويحسنو ليك بلا ما

خليه تايه خليه

خلي حلام الليل تدهيه

خلي حر الريح يشويه

خلي مواج البحر تديه

خليه يعرف الشايط ليه

خليه يترجى ربو يغفر ليه

خليه يشد التيمومة و التسبيح

كلمة ضلت بخباها

تنسا مخرج يلكاها

 وتصيب دورها ودواها

كلمة حقت مبغاها بمعاني

طوال

و ف صحاب التوبا لقات

رجاها

خليه خليه خليه

رجاء بوسبابة 2008

معنى و كلام

حمري ف بلادو يتسنا

حمري ف بلادو يتمنا

ما يهضر ما يكول بغيت

ما ياف ما يكول خزيت

يتسنا الله يرحم عبادو

يتسنا الحاكم ينضم بلادو

حمري ماصل

علا ربو معول

ما يمد يدو باردا

ترجع سخونة

ما يمد فرحانة

ترجع مغبونة

ما يقبل الدل

ما يقلب على ريحتو

ما يبات يتنعتر

ما يبرح خيمتو

ف بنادم ما كاين تيقة

الدنيا تدور تعطيك بتصرفيقا

تروح وتعطي

تكفح وتدوي

علا كول المجدوب

الدنيا يسموها

ناقة لا عطفت

بحليبها ترويك

ولا عصفت متعول عل الباقة

يتكفح لو كان بين اديك

حمد ربك

وتسن الرحمة

عزة النفس واجبة

دير راسك ف القمة

لا تولي تنوض

لا تولي تكعد

لا تلف الهضرة واللجاجة

وتولي تقلب

علا خراجة

وتديك العجاجة

وتبقا حمر تمنا وتسنا

رجاء بوسبابة 17/05/2008

الشمـــــاعيـــــة

كانت قصبة قصيبة

ناسها سيبة

ديورها مهدماوريبا

هادي صفحة وطوينها

ولات شماعية

مون عينك وعينيا

مجبدا مكردا

هادي صفحة وبديناها

الستيلو ل بغا يكتب تبوشا

العقل ل بغا يفكر توشا

وبنادم ل بغا يبدع مشا

اش نديرو ف حضانك المكوشا

الناس عايشة مزرية

القلوب مخزية

لا كسوة مكسية

لقراية منسية

الخوف دار فينا شابحا

الرحبة ولات مدابحا

زيما مبقات مالحا

كال سيدي عبد الرحمان المجدوب

ركبت على زيما بان ليا الخميس

لكان الخير ف القرودا

راه ف حمارة معا الفطانيس

شهدو ياحمر

ها حلاوت الثمر

ها قسوحيت الحجر

هاعفيت المجمر

ها كلامي خارج

من جوف مدموم

ها كلامي خارج

من گلب مهموم

ها كلامي خارج

من سر مردوم

ها غرامتي انا علا العنگ المعدوم

الشماعية

رجاء بوسبابة 2008

لجـــــــراح قويـــــــــة

هاد الجرح ما بغا يبرى

هاد المرضة غاديا طول

هاد العين باقا تدمع

هاد لمسافر ما بغا يرجع

هاد الشمل ما بغا يتجمع

بغيت نصهل بصوت يتسمع

ينيم الديب يفيق السبع

ينوض يخدم شويا

ميبقاش مربع

كلمة تحول وتجول

تنسي العاقل تفگد المهبول

كلمة تلالي

تسالي

تراري

تنيم الفايق تنوض الراگد

يخدم شويا يناضل ويجاهد

بلادي محگورة

جنابها مضبورة

لا صحبا لا جورة

ديورها مهجورة

لازمها صمطة مصعورة

لازمها صوات مجهورة

لازمها عقول مبهورة

لازمها عيون مبصورة

لازمها قلوب مسرورة

لازمها دفة ميسورة

لازمها قفل ما يتفورة

باش تطرد الكلاب المجعورة

باش داوي جراحها المضرورة

باش تبني ديورها المهجورة

باش تسد الدفة الميسورة

وتزيد قفل على قفل

عمرو ما يتفورة

رجاء بوسبابة 2008

 *****

  ***
  * 

زجل : فلسطين

جيتك يا أرض فلسطين

بالراس المحدور

حاير ويدور

دايخ في الحروف

باغي كلام..

ماسبق ليه الفهام

تكتب ويرجع

شاف ليك

وعشق سوارو

وماعجبو حالو

لو كان الدمع

يحرر ترابك..

كنت نبكي الدم

ونموت في حضانك

لو كان العمر

يتعطى هدية

كنت نعطيه

غير نلقاك

كيف الطير في سماه

فلسطين..

الوردة ياالوردة..

كانت جنانك..

بالدمعة الدمعة.

كانت ويدانك..

نور على نور ،

كانت سهادك

فلسطين جبال،

وقفت في ريح الزمان ..

فلسطين كل الأحوال

إلا الزمان..

كلامي كثير ،

في جوفي كبير ..

وكلما نكتبو فوق الوراق

تبلعو ماتعرف تشربو،

ونلقى الورقة خاوية

ونرجع نلوم هاد الراس

مايقد يعبر عن أغلى فلسطين

نختم كلامي ونكول..

مهما يطول ليل فلسطين ،

لابد ما يطلع نهارو

أواش من نهار..؟!

وقت ما يفرح الطير في سماه

والحوت في ماه..

وترفرف من الفرحة

 عروق كل قلب مومن.

أمينة بورجة 2008

*****
***
*