السكينة

السكينة

اعييت من لفهامة او قوة لكلام
نغلط ونتيه في الظلام
نكذب باش نبرر للعوام
المخ غارق في التخمام
والفكر اقصاني


ابغيت غير نتحيمر
نشوف او نسكت ونتسمر
ما يهمني اكلام فيه انفكر
و لا سلوك منو نتكدر
هذا الشي عياني

اللي ابغى يكون يكون
بعقلك ولا مجنون
اللي ابلاك ما ابلاني
واللي اداك ما خلاني
فيدك يا العالي

يسر لي أمري
اعليك توكلت
واعطيت احماري

ساعدني يا ربي
نعرف الطمأنينة
عاوني يا ربي
نعيش السكينة
..........
......
...
شوف...شوف وتمعن
لا تدوي لا تتكلم
لا تفكر لا تخمم
غير اجني لمعاني

لا تجتهد لا تمل
غير اتحل و استقبل
النور من لكواكب عليك ينزل
تهمد النفس ويتحل لعقل
وتسبح للعالي

انت غير شوف
شوف يا البراني

21/08/2004 الشماعية