سبّاط الزيدي

سبّاط الزيدي

آسكّان الدنيا سمعو

اللّي عندو شي سباط

يسمرو ويصبغو

شركات السبابط غا يسدّو

بعد ما اجرى لْ بوش وولدو

مع سباط الزيدي

الله يحفظو

السبابط أشكال وأنواع

فيهم الخانز ﮜاع

وفيهم لمنخوي اللّماع

فيهم لكحل وفيهم القهوي

وفيهم المسخوط وفيهم المرضي

وقليل في السبابط

اللّي عندو كرامة !؟

ﮜاع السبابط كايتداسو

حتى دوك اللي كايتباسو

وحتى اللي مولاه عاجبو راسو

كلشي مدلول

كلشي كايرشّو البول

إلاّ واحد في السبابط

تحلْ من لمرابط

وشير على كبير لملاﮜط

مشات الفردة الاولى بالخف

خلاّت بوش يقفقف

تبعتها الفردة الثانية في الصف

كلشي اتلف

وادخل سبّاط الزيدي للتاريخ

آخوتنا الصحافة

آ لحقوقيّين واهل الثقافة

يا لمنظمات الغير الحكومية

يالجمعيات النسائية

يا المجتمعات المدنية:

اسمعت شي هدرة

واخ الهدرة ما تشري خضرة

ﮜالو بعضين

غادي تصدر شي قوانين

تمنع السباط

في الاجتماعات العمومية

وﮜالو خْرين

سبّاط الزيدي

بغيتو يا اوليدي

غا نشمّو ونردّو ليه

                                    الشماعية

                                      15/12/2008