افهمْ ولاّ ﯕاعْ لاتفهمْ

افهمْ ولاّ ﯕاعْ لاتفهمْ

منّي كنت درّي

اعلى اخلاصي كنت نبرّي

مرّة نمشي...مرّة نجري

مرّة نوقف...مرّة نسري

كلام تعلّمتو وكلام تسرّبْ ليّا

شويّا اعرفتو والباقي ما تفْهم ليّا

والمصيبة ...

اتوهّمتْ راسي قاري

وﯕلت نعلّم الدّراري

واشْ اتعلّمتْ؟ احْسيفة

الكبت والنّقص والأنانية

زادو اعليّا

وبغيت انغطّي ما بيّا

هايْ هايْ اعلى ما اجرى ليّا

ابحال الشتى اوقعْ ليّا

الأم تجري وتطيح

والبو ادّاهْ الرّيح

واللّي ابقى غَ حالْ فمّو

يعضْ في السرْنيحْ

اكبرت واكبر وهمي

اتزادْ اكلامي وقلْ فهمي

ابغيت نفتي ونﯕول الموعظة

ونكون علاّمْ في التبوريضة

ضحكت اعليّا لمكحْلة

واجفلْ منّي العودْ

ماشي منْ والى كايتْوالى

*****
***
* 

تّبليتْ بحب المالْ

ابغيت منّو راسمالْ

ﯕالو القومانْ

كل ابنادم عندو ثمنْ

واللّي باع راسو اشريهْ

ادخلتْ للانتخابات وخدّمْتْ لقوالبْ

صدْقوني النّاسْ وانا غير كاذبْ

اللّه غالبْ

هما اللّي اكوانبْ

ولاّ باعو روسهم بالقوالبْ

 النتيجة ابحالْ ابحالْ

كذبتْ كذبة اعلى راسي

وصرتْ عبدْ ليها

ولّيتْ انقلّبْ اعلى اخلاصي

وحلْتْ فيها

ابغيتْ غير ننعسْ هاني

آيْ هايْ مين انحصّلْ اعليها

اشحالْ يخصني باش انعيشْ

غني ولاّ درويشْ

قاري ولاّ ما قاريشْ

علّمونا الحرفة ومعاها لقْوالبْ

نسّاوْنا لمروّة احسبنا النّاسْ ﯕاعْ اكوانبْ

اديالي ليّا

وديالكْ لينا

اللّي حنْ يتمحّنْ

اللّي رطّبْ راسو يتحسّنْ

ويموت جيفة او ديفيلي

المالْ يحبْبوك فيهْ

ومنّي تبغيه

وتصيرْ عبدْ ليهْ

مين تْدوزْ ليهْ؟

شدْ الصّفْ واتساوخرْ

هيّا قبلكْ واقبلها لاخرْ

يشيط ليكْ غير الدّلْ

ويﯕولو ليكْ اللّي ابغى لعسلْ

يصبرْلقريصْ النحلْ

وافهمْ ولاّ ﯕاعْ لاتفهمْ

كون عوْدْ ولاّكونْ ابغلْ

 الشماعية
14/02/2010