الوصولي

الوصولي

خلّيتو اورايا الﯕيتو ﯕدّامي

واحنا شادّين الصّفْ

الّيدْ علْ لكتفْ

واشْ تﯕلبْ الصّفْ

ولاّ هو اللّي تلفْ

ولاّ كيعرفْ منين يْتكلْ لكْتفْ

أنا اذكى منّو

وقاري وفاهم اعليه

وهو اسْلتْ

وعرف مين يفلتْ

ادخَلْ ما اتلفّتْ

اتركّنْ واسْكتْ

ومْسحْ الكابّة

وﯕال هذي هي الإدارة

الﯕيتو فرْملي والﯕيتو اطبيب

الﯕيتو في الطوبيس والﯕيتو في الدجيب

كاين في المدرسة او كاين في لمسيد

او فين ما نتلّفّتْ

نلﯕاه كيهفّتْ

باغي يسلتْ

ويﯕولْ أنا الإدارة

العلم اقراية

بحث وادْراية

سيرة وْ سلوك

واحترام للشّيباني والبعْلوكْ

وْ للّيتيمة وْ لبنت الملوكْ

ﯕالْ ابن رشد اكلامْ زينْ

العلم اللّي هو الفقه في الدّين

ماشي احفاظة واتباهي وتْطنْطينْ

العلم نور وضْعو الله في القلبْ الزّينْ

وﯕال اكْلامو إنشطينْ

البساطة هي الدنيا وهي الدين

وفينك انت وفين اخريْنْ ؟

 الشماعية

14/02/2010