9 août 2007
4
09
/08
/août
/2007
15:05
في خاطر لحباب 6
الحال...الحال
الحال والحال ما يشاور
تكون كْاعد حتى تتحير
واللي تزير
ما كاين فاش يتخير
فين ما ولاه الما يطير
المصيبة ايلا كان الما لكبير
والبيت مسدود وصغير
وعامر دراري
شي يحزق شي يبول
طاقة وحدة الفوق على طول
وشم يا المهبول
واحد منا تزير
غير كْاعد ويتحير
ما بقى ما يحصر
شاور أحمد لفقيه
كْال ليه إيواك لميكة الشهدية
تنفس وسد اعليه
وعنداك تشيط ليا
محمد إيكْوديان
معلم النيشان
في الكورة والعوم مزيان
واحوايج اخرى حتى هيا
بالخف سربكو في الميكة
ما كاين لا وسخ لا تعليكة
والريحة حتى هيا
الله يعطيك الصحة
يا الهلاابا
السايح مشروع طبيب
ارزين ولبيب
مأذب ما شي سفيه
يدوز على الصداع من لهيه
لبس الفوقية ولا افقيه
اعليه سولو لمخازنية
فين الطبيب
بان يا لحبيب
نداووك في هذ لعشية
سي أحمد سرط ما ا دوى ما تلفت
حتى جرو المخزني من الفوقية
نوض انت لهيه
نسلخو امك شي شوية
ناض السايح يتجر
في جلايلو يتعثر
غابر وسط الفوقية
خلي عليك لفقيه
كْالوها لمخازنية
تقتلوه ونوحلو فيه
غير خليه اعليا
وا سلكت آحميدة
يتبع
Published by zaki
-
dans
hommage à la jeunesse
9 août 2007
4
09
/08
/août
/2007
14:32
في خاطر لحباب 5
التحدي
شكون كْال على على لعصا نكْدو
نتحداو لغدر
وعلى لوجع نضحكو
مني واحد منا يجرُو
ولعصا في جلدو نسمعو
لبعضنا نتحازو
ونقراو اللطيف
مني صاحبنا يرجع
مهموم باغي يتفركْع
هذا يلوح كليمة
وهذا يتبسم تبسيمة
حتى النور في وجهو يتقشع
ونكْلبوها ضحك
ولمخازنية والقايد
يموتو ب لغدايد
مني عياو من لعصا
مشاو للعسة
ولاً داتهم نعسة
حتى احنا عيينا
اكثر البول فينا
نبولوه في القنت ويرجع لينا
ومني النعاس غلب اعلينا
في البول سرحنا رجلينا
وشحال دافي آسْ
بين البول والويل
والضحك والتريكْيل
انا وعبد الحفيظ
نعسنا مقردين
مرة يتكى على اكتافي
مرة على اكتافو نتكى
مرة تخرج تنهيدة
مرة تسلت نكتة
وسهرنا الليل
الليل يا عيني يا ليل
لا شمعة لا قنديل
لا نعمة لا ما يسيل
لا نغمة لا مواويل
الدراري ناعسين
شي يتنهت وشي ينين
لمخازنية مرعوبين
علينا عاسين
ولا منا خايفين
عقلتو على عبد الجليل مسكين
صبح ينين
توحش خبز مٌو لبنين
القهوة بالعطور الزين
وريح بلادي
واخ يا لعمر واخ
طوال عليه الحال
تنهت وكْال
الملل آخويا الملل
ركبتنا موجة من لهبال
ضحكنا ضحك حلال
ما يتشرى بمال
الغمة...الضحكة فجاتها
تموت العكْرب وتموت سخارتها
تموت اللفعة وتقطع كعلالتها
وسعداتك آ فاعل الخير
يتبع
Published by zaki
-
dans
hommage à la jeunesse
9 août 2007
4
09
/08
/août
/2007
12:32
في خاطر لحباب 4
ياك صاكْونا ...صاكْونا
صاكْونا وسط الناس
منهم الحاضي ومنهم العساس
والقاريين فينا ولاد الناس
كْالو هذا ظلم ولاباس
ما يدينا اعليه انعاس
ولمن تعاود زابورك آداود
صاكْونا والناس تشوف
صاكْونا صوكْان لخروف
ادخل للزريبة وتشوف
ماكْدهم لخروف
دارونا حلٌوف
دخلونا للبنيقة
هذي ركلة وديك تسرفيقة
والله ينجيك من المشتاق ايلا داق
واحد ما قاري
معقداه لقراية
يعايرني
ويهين الزين اللي حدايا
احسب باللغة العربية
واحد ...اثنان
الضربات على اللويدات
ب العصا والتيوات
والله يخليك يا الدنيا
و انتي مولات لغدر
النعجة جارية على القنجر
والسلوكْي يتمنظر
نوضو اعطيرة
تبعوه جمال و حاميد
لعصا على الرجل و اليد
و الترمة حتى هي
اللي خرج واقف
يجي زاحف
على مهم حالف
يدير ...ويدير
جات نوبتي
جروني من شعكوكتي
كْدام لبنيقة مرحوني
دارو بيا ستة
على وجهي طرحوني
جوج لواو رجليا
واحد من تحت الكرسي لوى ايديا
وجوج دارو بيا
شغل الحدادة
بسماطيهم يعطوني
كلي زركْوني
مات جلدي اعليا
فاتت الضربة الساتة
جاتني الساكتة
بحالا كايضربو في الحايط
واحد ولد لحرام
عند راسي واكْف
بالبرودكان
كاينزل اعليا
الضربة مثنية
من الكْنة بالسباط
ومن الجبهة بالدص
آش هذ النحس
الله يكْطع ليهم الغرس
خرجو اعليا
المعدل من سطاعش و ثمنطاعش
لعشرة و حداعش
دوبلت في البكلوريا
داويت خمس سنين على راسي
تبرزطت وطار انعاسي
مانسمح للي سيفطكم يا لمخازنية
Published by zaki
-
dans
hommage à la jeunesse
9 août 2007
4
09
/08
/août
/2007
11:32
في خاطر لحباب 3
رايسنا لحنين
رايسنا لحنين
مشى للواليدية يتبرد
قهرو الصهد
ولاً جابو الجهد
شافنا شي نهار مقصرين
بين لكْياطن ومعانا خرين
ولاد زينين وبنيات
من الفوكْ مغطيات
ومن التحت عريانات
كاينوضو يديرو شطيحات
الحلاوي، بالبانجو ينغم نغيمات
افروح يصيح صيحات
و اعلى طامطام الرايس يسمع ضريبات
فين غادي بيا خويا فين غادي بيا...
حاميد وبن الجمل لوليدات
مع البيلاني يشمخو شميخات
عبد الحفيظ يلوح كليمات
عبد الكريم غا ساكت
إيكْوديان ساهت
عبد الله خوه سالت
الجنيدي غا يتلفت
على نوردين كايبحث
والزاكي يغوت
ياك اركب على لدهم
وا يجري كْاع ما يندم
عبد العزيز ولحموزات
في الشماعية يجيبو المونة للخيات
وفي واحد الساعة
تكْلب النشاط
ولًى زلاًط
جاو لمخازنية مقصدين
علينا محرشين
ما دواو حتى ضربو
نواونا نهربو
ناضت الروينة
لهذاك قتلة عطينا
عبد الله سلت عند خالو
والجنيدي زاد فحالو
ونور الدين ما بان خيالو
وسنيديف ما كْال والو
واللي سلت فلت
واحنا...احنا
دارت العسة بينا
يتبع
Published by zaki
-
dans
hommage à la jeunesse
1 août 2007
3
01
/08
/août
/2007
02:11
في خاطر لحباب 2
تعقلو آ لولاد
نهار قطعنا الواد
لعبنا الكورة شداد
وعيينا
تلفتنا للما لقيناه جاد
وبعاد الشط اعلينا
درًعنا...
وفي الما سرنا
ومني عيينا وترخينا
رجلينا حطينا
وفي الفوندو هوينا
احباب وتخاوينا
لغريق نجينا
ووصلنا للبر كاملين
ونهار لعبنا مع الحي الحسني
وعطيناهم قتلة
عقلتي ...وشحال كْدك ما تعقل
كنا ندُو لمقريش والسطل
ونضحكوا حتى يخرج لينا لعقل
فين سنيديف
يتلاوط بين لكْياطن
شادُو بوتليليف
يشير كيف الشياطن
وطرن في الملوي
دبر على ماتشوي
بدًل الشين حا
الله على راحة
لكبير فينا كان صغير
بالطبل والبندير
كْلنا ساهل التغيير
جرينا في الدوار والدووير
يحيا الحاج
يحيا التغيير
وقهرونا لكلاب
وولاد ل..حاب
اللي حصل يودي
واللي سلك يعدي
يتبع
Published by mohamed
-
dans
hommage à la jeunesse
31 juillet 2007
2
31
/07
/juillet
/2007
03:03
في خاطر لحباب 1
في واحد العام
عيينا من لقراية والتخمام
وصهد الشماعية
تجمعنا احنا لكْران
قاريين ماشي اعوام
كْلنا نتبردو في الواليدية
تجمعنا صحاب
اللي ما دار صاك دار قراب
وجوج كْياطن يا لحباب
هزينا الرحيل
سرتنا في الليل
صبحنا في الواليدية
ولاد البور جاو للبحر
درنا النوبة على المجمر
وآراك للكورة والما مع لفجر
فينا العوًام وفينا لكويري
منا الفنان ومنا القاري
فينا الأداب
وفينا حتى لبلى
تعاشرنا عشرة لخوت
موس وحدة تدبحنا
المونا قليلة عيش لا تموت
ماعون واحد يجمعنا
جا الضيف المنعوث
الدجاج تقدينا
اجريدة وسي محمد انسيبو
صالح و لشهب احبيبو
فرق اعطيرة اللحيمات
اعطى للضيوف لفخيدات
او للسايح و لحموزات
اعطى لعظيمات
سكتوا عندنا الضياف
ما تكونوش من لخفاف
ابغينا نصوبو الرغايف
لا كْصرية لا زلايف
غير الصينية
شي يكب الما وشي يخلط
الله ينعل بو الزلط
بغينا الرغايف جا بغرير
وطاب شفنج في الأخير
و شحال جا ابنين هذاك الجير
يتبع
Published by mohamed
-
dans
hommage à la jeunesse
