اللوّاية والشجرة... ولاّ محكمة الأسرة

اللّواية والشجرة...ولاّمحكمة الأسرة

 

بين الرغبة

وشويّا ولاّ بزّاف من الرهبة

القلب كيتعدب

يبوح بسرّو

يشكي بضرّو

ولاّيبات يتگلبْ

العشق ف الربيع لوّاية

تتْلوّى اعلى الشجرة

تتوحّد بها

تولّي منها وليها

ما تعرف اشكون المضرور

العشق عند ابنادم شوّاية

تكوي لگلوب

تهيّج المحبوب

يتسارى بين الدروب

يتسنى احبيبو

ايلا اطلع ليه الزهر

يغنّو ليه:

هاهو باقي اخضر

هاهو تاع لفجر

وتبدى لحكاية

من :

ها انتا ايلا ابغيتيني آنا

جيب الحولي كتفو بالمگانا

أو  مانعجن ماندير اخميرة

حتى يجي حبيبي ويجيب ليّا كوميرة

نصدقو في:

ها لحْبقْ اهْبلْ وزاد لهيه

ها ربّي خايفاه ل يفوت امّاليه

او انت اللّي ولدتيه

ايوا گدْ بيه

الحجلة تولّي عجلة
وتدردك اعليه

هذ الراجل

ولّى تارك او فاعل

ما ابقيت گادّة اعليه

گالت الشجرة للّوّاية

ترخاي اشويّة

گالت اللوّاية للشجرة

ارقاقي بلا هدرة

گالت ختْ لمرة

الدرّي وعلاش ربّيتي

گالت النسيبة

الرّاجل وعلاش ولّفتي

وگالت الجدة

ايلا كان اصعيب صبري ليه

حتى يغفل وسرّجيه

ويلا سرّجتي ركبي اعليه

وايدك ليه ايدك ليه

گال هوّا

اسكنت لمحاگن وركبتني لبرودة

ايلا كان الخير في حوّا

 راه حتى في لقرودة

 

انتي جيتي غير ساكتة

ولّيتي فاعلة وتاركة

وگالت اللّوسة

خويا تغصب في اشبابو

وگالت لعدوزة

ولدي تحرم من احبابو

ويتدخلو اصحابو

وتقوى الهدرة

تخسر الجرّة

تدخل لْ محكمة الأسرة

و يشويني فيه

واللّي ما جرّب عاودو ليه

تدوز الجلسة

يتدار الصلح

ايلا ما تگادّو

يرجعو للقبح

يولّو في لعب الدراري

ومشات اعزيبة  وْ جايّا تراري

وتندم اعليه

كنّا في ارحمني يا لفقيه

اللي احسبتي عليّا نعطيه

اصدقنا فْ مولى خايمتي

بغيت نولّي ليه

وانت كنتي معفّر وزاعم

ولّى خاصّك غير مع من تتفاهم

من الاول كون اصبرتو

كلها يعرف آش ليه واش اعليه

بلا انهار اللول ايموت المش بلا افقيه

بلاحگرة بلا ايدكْ ليه

يا النسيبة يا اللوسة

خلّو اعليكم لعريس ولعروسة

الزمان اهتر

لفساد اكثر

اقوى الضر

والأسرة احْصانة

                                               شيشاوة 3/1/2009