الشيفور مشموم الهيجات

الشيفور مشموم الهيجات

 

عبد الرحمان الشيفور

في الطوبيسات بآسفي كان مشهور

فين ما بان ليه الزين يدور

واخ يحرﮔ قانون المرور

يﮔا ري الطوبيس ويسكت الموتور

ويخلّي الركّابْ بحال ﮔلبو تْفورْ

وينزل عند اغزالو مبهورْ

 ***

ما نْشوفوكش آ الزّينْ ! ؟

ايلا ابْغات تضحكْ حتى الْودنين

ايلا ما ابغاتْ يرجع عبد الرحمان مسكين

يﯖول للرّكابْ آشْ وقعْ يا الجّاهلين

ما في اخباركم ربّي حبْ الزّينْ

اللي اعرف عبد الرحمان يتبسّمْ

واللي ما عرْفو يتألّمْ

 ***

وتبان ليه امرة اخرى

في الطريق مسرّحة ولاّ في الدّوْرة

يطلع بالطوبيس للطروطوار

ما يهمّو راكب ولا جارْ

*** 

طيّبتي ﯖلبي آلغزالْ

ها التيليفون وها المالْ

حبْ الزّين احلالْ

ما تحيديش خوكْ من البالْ

 ***

ايلا ضحْكتْ ديالو

ايلا اتقلّقتْ يجيه اعليها حالو

يسبْها ويسب الطوبيس

وينعلها وينعل الناس وينعل ابليس

ويركب ويعطيها للّعْفيسْ

 ***

عبد الرحمان مشموم الهيجات

ما عندو اصحاب غير لعيالات

واحليمة ليه ما ابغات

حلفت عندو ما تْباتْ

ايلا ما جا طالبْ وْ راغب

وفيها خاطبْ

 ***

وْ جا عبد الرحمان غا يفوّج

الﯖى براسو تزوّجْ

دار العرس وتبهّجْ

او مرحبا يا لعيالاتْ

 ***

انعل عبد الرحمان الشيطان

ولّى يمشي للخدمة زربان

ويرجع للدّار فرحان

زين احليمة يرْوي العطشانْ

*** 

وشاف عبد الرحمان الزّين واتلف

واعيا ما يحلفْ

هذي غمْزة وهذا حرْفْ

ورجعتْ المغرف لاشْ تعْرفْ

*** 

في الحين وصلتْ لخبارْ

جابوها اصحابات الحالْ لكبارْ

وخافت احليمة اعلى لوليدات و الدّارْ

هاللّي تنصح با لْسانْ لحمارْ

ها اللّي تﯖول ازغيبات الفارْ

ها اللّي توصّي اعلى طالب من لحْرارْ

يودّر ليه الريْ ويرجّع ليها الشوارْ

 ***

اقواو اعلى احليمة الرّاياتْ

وتلْفوها لعيالات

ها اللّي تتألّم ليها

 ها اللّي تضحكْ اعليها

*** 

واختارت الوصفة المنعوتة

السّاكْتة والمسْكوتة

دﮔتها زنزونة دﯖة ملكوكة

طيْبتها احليمة طيبة محبوكة

ولعبد الرحمان قدْمتها مدروكة

مرحبا ب السّي عبد الرحمان!

*** 

عبد الرحمان فايق

وبقوالب النسى عايق

لشوفة احليمة ما اتهنّى

القضية فيها إنّ

 ***

قدّم ليها عبد الرحمان الطعام

ﯖال ليها مرحبا وزيدي الﯖدّام

انتي اللّي تمحنتي اعليه

كوليه واتبنّيه

 ***

اكلات احليمة الطعام وما اتبنّتْ

السّاكتة والمسكوتة اعليها رجعت

ومن ذاك الوقت زنزنت

*** 

عبد الرحمان دار جوج امكاحلْ

وحدة خارج الدّار و وحدة داخلْ

ولّى غير يتهمصص

لمرة اللّي شافها اديالو

واللّي ما شافها ليه فيها النّصْ

 ***

ﯖالتها نورة مألمة وتتبسّمْ

احليمة ما تتساهلْ يا الفاهمْ

ذبلْ زينها بحال ايلا واكلة السم

واللّي زادها في الهم

عبد الرحمان ما خمّمْ ما احشمْ

زوّجْ ولدو لشيخة اكبر من الامْ

*** 

جاوبتها سنا

ابغات الدّار تخوى

ويدير هو ما ابغى

ينوّض الريتول في الارض وفي السما

واللّي ما ابغاتو يعطيها لعمى

 ***

ﯖال عبد الرحيم وهذا مسخوط

ﯖال عبد اللطيف وهذا ملﯖوط

وﯖال سي محمد يمكن غير مربوط

والربطة زغبية

وما الﯖى اللّي تبرّدْ ليه الكية

وجاتو هذيك الكندية

في اعمرها 65 ما شي ابنية

ﯖال ليها أنا مسكين حنّي فيّا

راني محروم من الزوجيّة

ونعيش مع احليمة اختي ما حرْ الكية

*** 

ﯖال عبد الرحمان لاحليمة

انتي اختي ما اتزيدي حتى اكليمة

نسافر وانجيك بالتبسيمة

 ***

احليمة سكتت

واش اعلى اكلامو وافقت

ولاّ من همّو اتفكّتْ

ولاّ امشى ولاّ ابقى ابحال ابحالْ

 ***

آسفي 17/09/2009