احضي صاحبك...ليْقوْلْبكْ
كثرة الهم تضحك
ويلا كان لعقل تبكي
لبلاد حاضنة ضرّي وضرّكْ
ما لقاتْ اعلى منْ تشكي
ها اللّي داير ودنْ كيّالْ
ها اللّي ما يهزّها منين تتقالْ
ها الشنّاقْ ها مول المالْ
وكاينين الرجال
نعاود ليكم واحد لحكاية
ﯕالها حسن في القهوة مني كان احدايا
ابلادي فيها التدبير
ب لحْلوف والغيطة والبندير
واحضي صاحبك ليْقوْلْبكْ
في شي اخلافة
منّي امشى الرايس لدار الضيافة
شكون يخلفو؟ ﯕالت الشوّافة
عيّطْ جاري على جارك
انت غادي تبقى غير باركْ
حوز لْ اهلكْ ولْدارك
لوزيعة اديالي واديالك
احلفْ ليهم وديرْ نظرك
اكثر الّلغط
ها الرّضى ها السّخط
ها أنا ايلا ابغيتوني هانا
تقو بيّا راني نعرف نْ ﯕرّعْ
راني احريفي ونعرف انوزّعْ
واللّي اكذبْ اعليكم كرشو تتفرﯕعْ
في مديونة تعاهدو اوليدات الشاوية
تحت الكرمة اتفرّقْ الديوان
عوّقْ الفرّوج اتساطحْ البارود
وفي زيمة اتواعدو لبّانّديّة في الشماعية
واحد هازْ المصحف
واحد معرّي كرشو ويحلف
اللّي خانكم اعلى اولادو يتلف
اللّي اغدركم يغبر ليه الشقف
الوزّاعة ابّانّدية
ولوزيعة مدخول او ميزانية
واحتى أنا عندي كية
في لقصيبة الشماعية
الشماعية اكواتني زادت ما بيّا
الشماعية
19/07/2009
